2008 ili üçün Tərəzi bürcünə proqnozlar.

Ümumi mənzərə: Ötən illərdə kifayət qədər təcrübə topladığınız üçün qarşınızda duran maneələrin əksəriyyətini dəf etməyi bacaracaqsınız. Bu istiqamətdə ilin ilk üç ayı xüsusilə əhəmiyyətli olacaq. Tərəfdaşlarınızın köməyinə arxalanın. Ümumiyyətlə, Siçovul sizi elə bir çətinliyə salmayacaq.

Ailə və sevgi: Təxminən, aprel ayından başlayaraq bu istiqamətdə daha fəal olmağa çalışın. Qızmar yayda işə-gücə bir qədər ara verib, özünüzü bütünlüklə sevdiyiniz şəxslərə, ailənizə həsr etsəniz, payıza enerjili şəkildə keçəcəksiniz. Noyabrda doğmalarınızı qoruyun. Evlənmək üçün ilin ilk yarısı məsləhətlidir.

Qarşılıqlı münasibət və dostluq: Ulduzlar qohumlarla münasibətləri qaydasına salmağı, gediş-gəlişi artırmağı, küsülüləri barışdırmaq təşəbbüsündə bulunmağı tövsiyə edir. Bu vəzifəni daha çox iyun ayından etibarən həyata keçirməyə çalışın. Oktyabrda əsas vaxtınızı münasibətlər zəminində qursanız, bu, uzun müddət daxili rahatlığınızı təmin edəcək.

Fəaliyyət, karyera və maliyyə: İş prinsipində irəliləyişi təmin etmək üçün ilk üç ayda aktiv olmağınız məsləhətdir. Bunun öhdəsindən gəlsəniz, ilin sonrakı dövründə sizə zaval olmayacaq. Yeri gəlmişkən, şəxsi büdcənizlə bağlı problemləriniz də aprel ayından etibarən qaydasına düşəcək və maddi durumunuzdan çox razı qalacaqsınız. İlin ikinci yarısında məşhurlaşmaq ehtimalınız da var.

Sağlamlıq və istirahət: Əgər qış aylarında səhhətinizi diqqətdə saxlasanız, spirtli içkidən uzaq olsanız, sizə zaval yoxdur. Sentyabr və oktyabr aylarında isə uzaq yola çıxmayın. İstirahət üçün yalnız avqust ayı uğurludur.